ភ្នំពេញ៖ នាយករដ្ឋមន្ត្រី សម្ដេចធិបតី ហ៊ុន ម៉ាណែត ថាការបាត់បង់គឺជាអ្វីដែលពលរដ្ឋគ្រប់រូបព្រួយបារម្ភ ក្នុងនោះក៏មានសម្ដេចផងដែរ។

ថ្លែងក្នុងពិធីសំណេះសំណាលជាមួយអាចារ្យ អាចារិនី ព្រឹកថ្ងៃទី១៥ ខែសីហា ឆ្នាំ២០២៤ នៅរាជធានីភ្នំពេញ សម្ដេចធិបតី ហ៊ុន ម៉ាណែត បានពន្យល់ជាថ្មីពីការអភិវឌ្ឍតំបន់ត្រីកោណអភិវឌ្ឍន៍ ដោយបានធានាថានឹងមិនបាត់បង់ទឹកដីដូចការព្រួយបារម្ភរបស់ពលរដ្ឋមួយចំនួននោះទេ។

សម្ដេចអំពាវនាវទៅដល់អ្នកស្រប មិនស្រប និងអ្នករក្សាផ្លូវកណ្ដាលក្នុងករណី CLV សូមប្រកាន់នូវការបញ្ចេញមតិរៀងៗខ្លួនតែសុំកុំធ្វើសកម្មភាពណាដែលប៉ះពាល់ទៅដល់សន្តិសុខជាតិនិងប៉ះពាល់ទៅដល់ការបែកបាក់ជាតិ។

សម្ដេចថាការបែកបាក់គឺជាមូលហេតុនៃការបាត់បង់ទឹកដី ធ្លាក់ចុះអរិយធម៌ និងវប្បធម៌របស់ជាតិ។ ការថែរក្សាបាននូវសន្តិភាពស្ថេរភាពនឹងរក្សាបាននូវសាមគ្គីភាពជាតិ និងការរីកចម្រើនរបស់ជាតិឡើងវិញ៕